成日有人問版主,香港 5G 訊號係咪好難收得到。呢個問題,唔係你睇市面乜嘢 5G 測試報告可以睇得到。因為乜 Zone、乜 M 最愛做嘅,係測速報告。唔係話無參考價值,只不過佢哋重點嘅係速度,唔係覆蓋。咁覆蓋有無得試?有嘅,但乜Zone、乜M、就算版主都無能力試到。不過,我有機會見識到。話晒跟咗流動通訊消息都有廿年,點都識啲業內人士,最近有幸跟咗一間係香港有做「覆蓋」測試機構,去研究一下,香港四個網絡商戶外 5G 覆蓋,係咪咁勁。大家一定最想八掛,四個台,邊間家陣有最廣嘅 5G 訊號!

    跟專業工程車掃訊號! 香港四台戶外 5G 覆蓋真比拼

    覆蓋測試點樣做?

    唔理 2G、3G、4G 定係 5G,要試覆蓋都係用以下嘅方法,係一個專業嘅方法。業內喺有專業量度電訊頻率嘅儀器,去到 2021 嘅今日,已經可以好簡單咁,放喺一架私家車款嘅「工程車」裡面,駁一部手提電腦就可以做到。

    呢架有儀器嘅工程車,會全港四圍去,而車裡面嘅儀器,只係做一件事:「掃訊號」。要知道,香港四間手機網絡商,所用嘅 2,3,4,5G 訊號,都有佢哋嘅指定頻率,呢嗰量度電訊頻率嘅儀器,就可以一次過紀錄唔同頻率嘅強弱。只要對應返唔同網絡商採用嘅頻段範圍,就可以簡單估算,四大網絡商,係某個地方,有無 5G 訊號。有訊號嘅話,係強定係弱。

    跟專業工程車掃訊號! 香港四台戶外 5G 覆蓋真比拼
    ▲ 呢架就係「工程車」,其實係一架七人私家車。

    有乜好,有乜唔好?

    呢個用工程車配合相關儀器「掃訊號」嘅方法,好處係方便 (專業儀器硬件成本上十萬,所以我話各大媒體包括 ePrice 係無可能用自己能力做得到 ),花一日時間行晒全香港道路就得。係呀,道路呀,所以只可以知道戶外嘅覆蓋,室內係無辦法測到。此外,連手機、SIM 卡都唔駛,因為只係測試有乜頻率,喺空氣中存在,加陣香港有四間網絡商,若果咁痴線,未來有 10 間,其實都係咁樣測,唔駛再花更多時間。

    有乜唔好?就係無得試「質量」。一個網絡好定差,唔係有訊號就夠,呢部份,大家都明。唔少網絡商,係有訊號都係「 load 空氣」。但無訊號,就乜都唔駛講。所以,今次工程車「掃訊號」測試,的確有其可取之處。

    跟專業工程車掃訊號! 香港四台戶外 5G 覆蓋真比拼
    ▲ 車入面放住嘅器材唔係幾部手機咁簡單,其實有一套量度儀器,業界人士一定知係乜。佢係一套專門用作訊號路測嘅儀器。工程車一路行就一路記錄低接收訊號嘅強弱,以及對應 GPS 定位嘅準確位置,係一個專業嘅網絡測量方法。
    跟專業工程車掃訊號! 香港四台戶外 5G 覆蓋真比拼
    ▲ 天線放喺車頂。
    跟專業工程車掃訊號! 香港四台戶外 5G 覆蓋真比拼
    ▲ 「掃訊號」唔係只係測到有定無咁簡單,仲可以測到強定弱。有留意 ePrice 嘅收費頻道 Patreon,我喺上年八月開始已經開文講咗點樣係手機睇訊號強弱,想知嘅,大家課金就得。今次講嘅係,工程車「掃訊號」會以 RSRP 顯示訊號強弱。而呢個訊號強弱係以 dBm 為單位。而相關軟件,會一次過 Show 晒天空有嘅訊號,並即時出到 report。

    訊號強弱定義

    不同網絡商,對訊號強弱定義都有唔同,SmarTone 嘅 5G 覆蓋定義為訊號接收強度不小於 -95dBm,但係中國移動香港就係 -110dBM (佢哋網站嘅 5G 覆蓋圖有寫晒出嚟架,公開資料嚟)。dBM 值負得越細,代表訊號越強。SmarTone 定義有 5G 覆蓋要求,比起中國移動香港都要高。不過,以版主嘅實測使用體驗,去到 -106dBM 左右,其實都會「上到網」,只係上網速度,唔會有你想像嘅 5G 咁快。

    跟專業工程車掃訊號! 香港四台戶外 5G 覆蓋真比拼
    ▲  一部普通嘅  Andriod 手機,都可以透過 App 睇到訊號強弱,呢個例子上,有兩個 RSRP 數值,對應 5G NSA 嘅數值為 -87dBM,代表 5G 訊號嘅強度。-87dBM 叫中上嘅成績,訊號叫強。

    行咗全日,我哋先睇睇全港嘅結果

    n78 (3.5GHz) 5G 黃金頻譜
    •    SmarTone:覆蓋港島、九龍、少部份新界東及新界西地區
    •    csl:覆蓋港島、九龍、少部份新界東及新界西地區
    •    3 香港:覆蓋港島、九龍、新界西、大圍、沙田、粉嶺及上水等新界地區
    •    中國移動香港:覆蓋港島、九龍、新界西、大圍、沙田、粉嶺及上水等新界地區

    數碼通 5G n78 覆蓋
    ▲ 綠色部份代表覆蓋良好 (-90B 或更低),、藍色部份代表覆蓋普通( -90 至 -110)、紅色部份代表覆蓋好似甚至無覆蓋 (低過-110)。

    n1 (2.1GHz) 
    •    中國移動香港:覆蓋集中新界東、新界北及港島南區好細嘅地區
    •    csl:覆蓋港、九、新界大部份地區
    •    SmarTone:覆蓋港、九、新界大部份地區
    ​•    3 香港:覆蓋港、九、新界大部份地區

    CMHK 5G n1 覆蓋
    ▲ 綠色部份代表覆蓋良好 (-90B 或更低),、藍色部份代表覆蓋普通( -90 至 -110)、紅色部份代表覆蓋好似甚至無覆蓋 (低過-110)。

    只談訊號,四間網絡商邊間最強

    睇圖比較,5G 黃金頻譜 n78 頻段,3 香港同埋中國移動香港嘅覆蓋比較好。至於強調做到大範圍覆蓋兼可以快手做到廣泛覆蓋嘅 n1 頻段,SmarTone、csl. 同 3 香港都幾全面,當中 SmarTone 同 3 香港更加係叮噹馬頭,而中國移動香港就要繼續努力喇。

    貼地實測

    跟住工程車實測,感覺原來覆蓋比較,可以咁簡單造出來 (當然要幾十萬買器材,仲要有車),但係準唔準呢?係工程車四圍去嘅時間,我都有用手機 Check 一 Check。其實,任何一部支援 5G 嘅 Android 都手機,都可以安裝 Network Monster 呢個 App,就可以睇到嗰陣收到訊號嘅 RSRP 值。以下就係幾個地點,用 Samsung 5G 手機,去查一下訊號。留意嘅係,分唔到 n1 定 n78 覆蓋,總之就係 5G 覆蓋。

    CMHK 5G 訊號
    ▲ 灣仔告士打道
    ▲ 柴灣運動場對出停車場
    ▲ 新蒲崗 Mikiki 商場對出
    ▲ 佐敦渡船角對出

    大家可以參考當中 5G NSA SS RSRP 值。數字越低,訊號越強。其實,只要數字唔高過 -100dbm 上網速度都可以好快。而若有 -80dbm 以下,而又係 n78 覆蓋範圍內,大家想像 5G 可以去幾百Mbps 下載速度就好大機會實現得到。睇咗之後,大家覺得邊一個台訊號最強呢? 

    轉載自:https://m.eprice.com.hk/mobile/talk/4247/217704/1/